၈၈၈၈ အောက်မေ့ဖွယ်

“ ကြယ်ကြွေ သတို့သား ”

ကြယ် ကြွေလို့လား

သူငယ်ချင်း မင်းဟာ
ယုံကြည်ရာကို ရင်သွေးလိုလဲ မွေးခဲ့တယ်။

သူငယ်ချင်း မင်းဟာ
ဒဏ်ရာတွေကို ဆီမီးလိုလဲ ထွန်းခဲ့တယ်။

သူငယ်ချင်း မင်းဟာ
ကိုယ့်အနာ ကိုယ့်လျှာနဲ့သပ် ရှင်တတ်ခဲ့ပြီးပြီ။

သူငယ်ချင်း မင်းဟာ
ကိုယ့်အရေပြား ကိုယ်လွှာ
ကိုယ့်အရိုး ကိုယ် အပ်လိုသွေး၊
ကိုယ့်ဝတ်စုံ ကိုယ် ချုပ်လို့
ကျကျနန လှခဲ့ပြီးပြီ။

သူငယ်ချင်း
သွားနှင့် သူငယ်ချင်း
ကြယ်အစင်းစင်းကြွေတဲ့
ဟောဒီကမ္ဘာမြေရဲ့ အနာတရတွေကို
ဒီကနေ့ နေ အပြင်းပြင်းပူတဲ့ ကမ္ဘာမြေရဲ့ဒဏ်ရာကို
လက်ဖ၀ါးတွေနဲ့ ကာကွယ်ဖို့ ငါတို့ နေရစ်ခဲ့အုံးမယ်။

သွားနှင့် သူငယ်ချင်း
ကမ္ဘာမြေရဲ့ ကြေကွဲခြင်း ဓာတ်ပြားထဲ
မင်းရဲ့ ကဗျာတွေ မာတိကာ စီဖို့
ငါတို့ နေရစ်ခဲ့အုံးမယ်။

သွားနှင့် သူငယ်ချင်း
ကျောင်းနံရံတ၀ိုက်
ဒေါင်း အလံ ပြန်စိုက်တဲ့ တနေ့
ငါတို့ … … ။

ကျောင်းသားခေါင်းဆောင်ဟောင်း၊ နိုင်ငံရေးအကျဉ်းသမားဟောင်း၊ နာမည်ကျော် စာရေးဆရာ တာရာမင်းဝေရဲ့ ဈာပနတွင် (၈၈) မျိုးဆက်ကျောင်းသားများကိုယ်စား ကိုမင်းကိုနိုင်မှ ဤကဗျာအား ရွတ်ဖတ် ဂုဏ်ပြုခဲ့ပါသည်။

တိုက်တိုက်ဆိုင်ဆိုင် (၈၈) နှစ်ပတ်လည် အောက်မေ့ဖွယ် ဒီမိုကရေစီရေး၊ လူ့အခွင့်အရေးတို့အတွက် အသက်ပေးခဲ့ကြရတဲ့ ရဟန်းရှင်လူ ကျောင်းသား ပြည်သူများအား ဂုဏ်ပြုခြင်းဟုလည်း ထပ်တူ ပြုနိုင်ပါသည်။